Tugir hnúfubaka í Skjálfandaflóa

Húsavík hefur heldur betur staðið undir nafni sem höfuðstaður Hvalaskoðunar á Íslandi í þessari viku. Veður hefur verið hið skaplegasta og flóinn er hreinlega fullur af hnúfubak en þessir klunnalegu en vinalegu hvalir hafa verið að tínast norður á bóginn frá æxlunarstöðvum sínum við miðbaug.

Farþegar allra hvalaskoðunarfyrirtækjanna á svæðinu hafa lýst upplifuninni sem algjöru ævintýri. Einn farþeginn hafði á orði að stundum kæmu hnúfubakarnir svo nálægt bátnum að það væri ómögulegt að taka af þeim mynd, eða myndband af bægslagangi þeirra.

Christian Schmidt, leiðsögumaður hjá Norðursiglingu sagðist hafa séð á bilinu 20 til 30 einstaklinga í einni ferð, þeir hafi virst vera mjög svangir og hafi unnið saman við að ná sem mestri fæðu. Annar bæjarbúi hafði á orði að vel væri hægt að fylgjast með þeim blása frá Gónhól, helsta útsýnisstað bæjarins.

Aðsókn að glæðast

 

Þá er loksins hægt að skynja vor í lofti á Húsavík eftir smávægis stríðni veðurguðanna. Starfsfólk Hvalasafnsins á Húsavík finnur fyrir því að ferðaþjónustuvertíðin er að komast á skrið og hafa aðsóknartölur á safnið verið að glæðast í maímánuði.

Opnunartími hefur verið lengdur í maí og er safnið nú opið alla daga 09:00 – 18:00. Frá júní til ágústloka verður opið daglega 08:30 – 18:30.

Það er vert að minna á verslun Hvalasafnsins sem hefur til sölu fjölbreytt úrval af minjagripum, bókum, fatnaði og íslenskum ullarteppum svo fátt eitt sé nefnt.

Búð