Menu
Jólalokun í Hvalasafninu
Kæru safngestir,
Nú þegar jólahátíðin nálgast viljum við láta vita að Hvalasafnið verður lokað yfir hátíðirnar frá 24. desember út 1. janúar.
Við munum njóta jólahátíðarinnar í faðmi fjölskyldu og þökkum veittan skilning á lokuninni. Við hlökkum til að taka vel á móti ykkur á nýju ári, þegar við opnum á ný 2. Janúar.
Hvalasafnið þakkar stuðninginn á liðnu ári og óskar öllum gleðilegrar hátíðar og farsæls komandi árs.
Jólakveðja frá Hvalasafninu á Húsavík!
Litið yfir árið 2021
Aðalfundur Hvalasafnsins fór fram í síðustu viku þar sem ársreikningur 2021 var lagður fram til samþykktar og farið yfir starfsemi safnsins á árinu sem leið.
Starfsemi í heimsfaraldri.
Heimsfaraldurinn hafði mikil áhrif á starfsemi safnsins á síðustu tveim árum, en í mótlæti myndast svigrúm til að koma auga á ný skapandi tækifæri. Tími sem einkenndist af samkomutakmörkunum og lokunum var nýttur í uppbyggingu og endurbótum á jarðhæð safnsins sem hafði ekki verið í notkun í áratugi. Ráðist var í metnaðarfullar endurbætur þar sem veggir voru rifnir út og endurbyggðir, gólf flotuð, drenað meðfram húsinu, múrverk lagað, lagt nýtt rafmagnskerfi, nýtt brunavarnakerfi og fleira.
Í kjölfarið var gerður var leigusamningur við Þekkingarnet Þingeyinga og Fab Lab smiðja hóf starfsemi í nýja rýminu nýlega. Fab Lab kemur af enska orðinu Fabrication Laboratory og er einskonar framleiðslu tilraunastofa. Smiðjan er búin tækjum og tólum til að búa til nánast hvað sem er og er opin öllum sem vilja þjálfa sköpunargáfuna og hrinda hugmyndum sínum í framkvæmd.
Samstarf milli Hvalasafnsins og Þekkingarnets Þingeyinga mun halda áfram að vaxa á komandi tímabili en nú standa yfir miklar framkvæmdir sem felast í því að sameina byggingarnar við Hafnarstétt 1 og 3. Með sameiningu verður faglegt samstarf milli stofnana eflst sem mun leiða til nýrra tækifæra á sviði rannsókna og miðlunar.
Hvalaskólinn tók aftur til starfa á árinu við mikla ánægju nemenda sem og starfsmanna safnsins auk þess sem unnið er að því að þróa hvalaskólann og gera hann aðgengilegan á netinu fyrir stærri hóp nemenda um allt land. Safnið leitar nú að samstarfsaðila til þess að þróa stafrænt námsefni fyrir komandi tímabil.
Í Maí heimsótti Eva Björk, framkvæmdastjóri safnsins, Mjaldragarðinn í Vestmanneyjum og fundaði með Audrey Padgett um möguleika á samstarfi í tenglum við sýningu sem tengist Mjöldrunum.
Hömlur í faraldrinum leiddu til þess að Hvalaráðstefnan var í fyrsta sinn send út í beinni útsendingu í gegn um Facebook, þar sem ráðstefnan er enn aðgengileg og hafa 570 mann horft á fyrri útsendingu og 325 á þá seinni. Vanalega hafa um 40-50 manns geta fylgst með ráðstefnunni í sal safnsins.
Safnið fékk styrkveitingar frá Safnaráði fyrir mörgum verkefnum á árinu og gengur vel að vinna að þeim, má þar nefna endurbætur í safnageymslu, skráningu og ljósmyndun á gripum, uppsetning á nýrri sýningu um gróður og líf á grunnsævi og verkun á beinagrind af hnísu sem verður notuð sem kennsluverkfæri.
Hvalasafnið í samstarfi við Whale Wise hélt Ocean Film Festival í fyrsta sinn og voru sýndar myndir sem eru innblásnar af hafinu, bæði valdar heimildamyndir og myndir sem voru gerðar af aðilum sem tengjast vísindasamfélaginu á Íslandi. Viðburðurinn var vel sóttur og skemmtilegur. Á árinu verður hátíðin haldin í annað sinn og verður stærri í sniðinu en áður. Hátíðin er í ár skráð í gagnagrunn fyrir kvikmyndahátíðir og tekur við umsóknum alstaðar að úr heiminum.
Um sumarið var loksins var hægt að prufukeyra sýndarveruleikaupplifun safnsins og gekk það mjög vel. Starfsmaður leiðbeindi gestum í gegn um upplifunina þar sem þeir upplifa að synda í hafinu umhverfis háhyrninga, búrhvali, hnúfubaka, grindhvali, seli og mjaldri. Nú er upplifunin aðgengileg innan safnsins og geta gestur gengið að henni og prófað án aðstoðar starfsmanna.
Í október var sett upp ný listasýning eftir þau Katrina Davis og Jack Cowley og er blanda af list og ljóðum innblásin af reynslu þeirra sem leiðsögumenn í hvalaskoðun við Skjálfanda.
Í desember var haldin jólamarkaður í safninu í samstarfi við Húsavíkurstofu og vakti sá viðburður mikla lukku, bæði meðal söluaðila sem og þeirra sem komu til að versla jólavarning og skoða safnið.
Árið í tölum.
Á árunum fyrir covid var aðsókn í safnið í kring um 30.000 manns á ári. Þegar heimsfaraldurinn skall á féll gestafjöldi niður í 11.000 árið 2020, og jókst upp í 22.000 manns árið 2021.
21% gesta kom frá Bandaríkjunum, 18% voru Íslendingar, 13% Þjóðverjar, 9% frá Frakklandi, 5% frá Ítalíu og 34% frá öðrum löndum.
Eins og við var að búast er rekstrarniðurstaðan töluvert betri en árið 2020. Sala aðgöngumiða og minjagripa er að aukast um 32,4 m.kr. milli ára og verkefnastyrkir eru að aukast um 3,5 m.kr. Alls eru tekjur félagsins að aukast um 118%.
EBITDA ársins er 12,7 m.kr. en í fyrra var EBITDA neikvæð um 6,1 m.kr.
Ársreikningur safnsins er nú aðgengilegur á heimasíðu.
Heimsókn í Mjaldragarðinn í Vestmannaeyjum.
Í liðinni viku heimsótti Eva Björk þær Litlu-Grá og Litlu-Hvít, mjaldrana sem fluttu á síðasta ári frá sædýragarði í Kína til Klettsvíkur í Vestmannaeyjum.
Heimsóknin var mjög áhugaverð og fræðandi. Hvalasafnið hlakkar til samstarfs með Mjaldragarðinum á komandi árum.
Verkefnið var styrkt af Safnaráði.
Uppfærsla á sýningu.
Í dag var listasýning eftir myndlistarkonuna Renata Ortega tekin niður úr sýningarsal Hvalasafnsins. Listasýningin var sett upp um mitt sumar 2018 og átti upphaflega vera til sýnis út árið 2019. Þegar kom að því að fá inn næstu listamenn sem ætluðu að koma til okkar erlendis frá setti heimsfaraldurinn strik í reikninginn og því var brugðið á það ráð að halda Renu þar til ferðalög yrðu möguleg á ný. Nú þegar líða fer að vori 2021 er en óvíst hvenær við getum ferðast hindranalaust á milli landa og verður því brugðið á það ráð að setja upp tímabundna sýningu um plast í hafi í samstarfi við Ocean Mission.
Ocean Mission er samfélag einstaklinga sem vinnur að rannsóknum og verndun hafsins. Verkefni Ocean Mission felast í tímabundnum rannsóknum á viðkvæmum hafsvæðum til þess að safna upplýsingum fyrir vísindamenn, löggjafavald og aðra hagsmunaaðila sem er annt um villta náttúru og heilsu hafsins. Áhersla er lögð á svæði sem vekja vísindalegan áhuga eða eru lítið sótt vegna landfræðilegra þátta. Sjónum er sérstaklega beint að rusli sem flýtur í hafi, þar með talið veiðifæri og plast, og miða rannsóknir að því að meta áhrif á lífríki sjávar.
Verið er að leita eftir styrktaraðilum til þess að aðstoða við fjármögnun sýningarinnar.
Hvalasafnið þakkar Renu innilega fyrir fallega listasýningu sem við kveðjum með söknuði.
Listaverk eftir Renata Ortega
Lokað í Hvalasafninu 20. – 24. Febrúar.
Hvalasafnið verður lokað 20. – 24. Febrúar vegna námsferðar starfsmanna til New York þar sem starfsmönnum er boðið í heimsókn á Ameríska náttúruminjasafnið. Tilgangur heimsóknarinnar er að skoða hvernig safnið nýtir gagnvirka sýningartækni til þess að efla fræðslu og þátttöku gesta sem heimsækja safnið.
Hvalasafnið opnar aftur þriðjudaginn 25. Febrúar.
Ferðin er styrkt af Safnaráði.
Sparisjóður Suður-Þingeyinga styrkir Hvalaskólann
Sparisjóður Suður-Þingeyinga úthlutaði nú á dögunum úr samfélagssjóði sínum 460.000 ISK til styrktar Hvalaskóla Hvalasafnsins á Húsavík. Það var Helga Dögg Aðalsteinsdóttir frá Sparisjóðnum á Húsavík sem afhenti styrkinn til Evu Bjarkar Káradóttur, forstöðumanns Hvalasafnsins og Garðars Þrastar Einarssonar Hvalasafnsstjóra.
Hvalaskólinn er samstarfsverkefni Hvalasafnsins , leik-, grunn- og framhaldsskóla á Húsavík og nágrenni, og stuðlar að fræðslu nemenda um hvali og lífríki þeirra við Ísland og aukin tengsl við lífríkið í nærumhverfinu.
Þessi styrkur mun nýtast Hvalaskólanum vel til tækjakaupa, þróunar námsefnis og vettvangsferða nemenda.
Þakkar Hvalasafnið á Húsavík Sparisjóðnum kærlega fyrir stuðninginn.
Opnunartími yfir jól og áramót 2019
Listamaður óskast
Hvalasafnið á Húsavík leitar að listamanni til að vinna sýningu í listarými safnsins fyrir tímabilið 2020-21.
Sýningin verður að tengjast hvölum eða lífríki þeirra með einhverjum hætti.
Áætlað er að unnið verði að uppsetningu sýningarinnar í janúar/febrúar 2020.
Umsókn eða fyrirspurnir má senda á eva@hvalasafn.is með fyrirsögninni Art 2020.
Með umsókn skal fylgja lýsing á sýningu og verkum ásamt kostnaðaráætlun.
Umsóknarfrestur er til miðnættis 20. október 2019.
Um yfirstandandi sýningu:
„Ocean & the whales“ eftir Renata Ortega.
Sýningin samanstendur af vatnslita og akrýl málverkum af hvölum sem finnast í Atlantshafinu og við norðurheimskautið. Sýningin stendur fram í miðjan desember 2019.
Páskaleikur í Hvalasafninu 18. og 19. apríl
Hvalasafnið bíður Þingeyinga og nærsveitunga velkomna í safnið á Skírdag og Föstudaginn langa. Boðið verður upp á spurningaleik fyrir fjölskyldur þar sem fimm heppnir þátttakendur geta unnið páskaegg nr. 4 frá Nóa Síríus.
Við hlökkum til að sjá ykkur í safninu um páskana.
Opið verður alla daga í Apríl frá 10-16.