Hvalaskólinn

Hvalaskóli Hvalasafnsins er verkefni sem miðar að því að fræða nemendur í leik-, grunn-, framhalds- og háskóla á svæðinu um hvali og lífríki þeirra við Ísland.

 

Gera má ráð fyrir að hver nemandi heimsæki Hvalaskólann fjórum sinnum á sinni leik- og grunnskólagöngu, þegar hann er á elsta stigi leikskóla, og þrisvar í grunnskóla; 2. bekk, 5. bekk, og 9. bekk.

 

Þannig fá nemendur verkefni sniðin að getu þeirra og þroska hverju sinni. Á þann hátt bætist við þekkingu nemenda í Hvalaskólanum hægt og rólega.

 

Yngstu nemendurnir fá auðveld verkefni sem byggjast á því að læra í gegnum leik og skoðun á umhverfinu, en sömu nemendur fá flóknari verkefni eftir því sem þau eldast, byggð á þeirri þekkingu sem þau hafa tileinkað sér áður í Hvalaskólanum.

 

Í júní 2013 opnaði nýtt sýningarrými Hvalaskólans í Hvalasafninu á Húsavík. Þar má finna verk nemenda í elsta árgangi leikskólans Grænuvalla, 2. og 5. bekk Borgarhólsskóla á Húsavík og nemenda í vísindaensku við Framhaldsskólann á Húsavík. Rannsóknir nemenda við Rannsóknasetur Háskóla Íslands á Húsavík skipa einnig sess á sýningunni.