Dagana 9-11 maí verður mikið um dýrðir í Hvalasafninu í Húsavík. Tilefnið er 20 ára afmæli safnsins sem átti sér stað á síðasta ári. Til stóð að halda afmælið í fyrra en vegna mikilla mannabreytinga meðal starfsmanna var hátíðinni frestað um eitt ár.
Afmælishátíðin hefst þann 9. maí kl. 18 með Hvalaráðstefnunni sem nú er haldin í fimmta sinn. Ráðstefnan er hugsuð sem leið til miðlunar upplýsinga um nýjustu rannsóknir á sjávarspendýrum í Skjálfandaflóa og víðar. Dagskrá ráðstefnunnar gerir starfsfólki hvalaskoðunarfyrirtækja, leiðsögumönnum og öðrum sem áhuga hafa á málefninu kleift að fræðast um nýjustu niðurstöður rannsókna.
Fyrirlesarar ráðstefnunnar í ár koma víða að. Fulltrúar Rannsóknarseturs Háskóla Íslands á Húsavík, þau Adam Smith, Charla Basran og Dr. Marianne Rasmussen verða með sitt erindið hvert áður en haldið verður í klukkustundar matarhlé. Eftir hlé verða einnig þrír fyrirlestrar, fyrst frá Katie Pavid (Náttúruminjasafnið í London) og Callum Mair (Iris films), Richard Sabin (Náttúruminjasafnið í London) og bandaríski hvalasérfræðingurinn Erich Hoyt.
Á föstudaginn 10 maí kl. 18 verður svo sérstök opnun á afmælissýningu Hvalasafnsins. Sýningin stiklar á stóru í sögu safnsins í máli og myndum. Allir eru velkomnir meðan húsrúm leyfir. Veitingar verða í boði.
Á laugardaginn 11. maí frá kl. 14-17 verður svo frír aðgangur í safnið ásamt því að sérstök afmælisterta verður í boði.
Starfsfólk og stjórn Hvalasafnsins á Húsavík vonast til þess að sem allraflestir sjái sér fært að koma og njóta afmælishátíðarinnar með þeim.
