Miðvikudaginn 18. maí var alþjóðlegi safnadagurinn haldinn hátíðlegur í Hvalasafninu á Húsavík. Þá fór fram formleg opnun nýju steypireyðarsýningarinnar sem loks er orðin að veruleika. Um 40 gestir komu saman í safninu af því tilefni og hlýddu á erindi frá Sif Jóhannesdóttur fyrir hönd stjórnar Hvalasafnsins, Guðmundi Guðmundssyni frá Náttúrufræðistofnun Íslands og Illuga Gunnarssyni mennta- og menningarmálaráðherra. Skemmst er frá því að segja að nýja sýningin vakti mikla lukku viðstaddra og verður vonandi mikil lyftistöng fyrir safnið.