Valdimar Halldórsson hefur verið ráðinn framkvæmdastjóri Hvalasafnsins á Húsavík. Valdimar hefur bæði reynslu frá einkageiranum og úr stjórnsýslunni. Undanfarið hefur Valdimar starfað sjálfstætt við ráðgjöf . Áður starfaði Valdimar  sem sérfræðingur hjá Íslandsbanka, Marko Partners og H.F. Verðbréf og einnig sem aðstoðarmaður ráðherra í atvinnuvegaráðuneytinu þar sem málefni ferðaþjónustunnar féllu undir.

Valdimar er uppalinn á Laugum og á Húsavík. Hann tók stúdentspróf við Framhaldsskólann á Húsavík, , B.A. gráðu í hagfræði  og M.Sc í viðskiptafræði frá Háskóla Íslands.

Hvalasafnið á Húsavík  er vinsæll viðkomustaður ferðamanna og hefur  rekstur safnsins gengið vel með vaxandi umsvifum í ferðaþjónustu í Þingeyjarsýslum. Fjöldi gesta árið 2015 var um 26 þúsund. Safnið var stofnað árið 1997 og er megin markmið þess að miðla fræðslu og upplýsingum um hvali og búsvæði þeirra. Með fræðslu og þekkingarölfun um hvali og lífríki þeirra eykur hvalasafnið m.a. á fræðslugildi hvalaskoðunarferða sem farnar eru á Húsavík og víðar.

Valdimar mun hefja störf  í ágúst.

Á morgun, laugardaginn 11. júní opnar ný sýning nemenda Hvalaskólans, auk þess sem uppskeruhátíð fyrir veturinn 2015/2016 verður haldin.

Nemendur Hvalaskólans eru hvattir til að kíkja í safnið og bjóða með sér vinum og vandamönnum, en frítt er inn á safnið frá kl. 12 þegar formleg opnun á sér stað og til og með kl. 16.

Í ár var sú nýjung að nemendur 5. bekkjar lásu söguna um Moby Dick í léttari útgáfu og eru því listaverk þeirra innblásin af sögunni um stóra hvíta hvalinn. Finna má listaverk á borð við teikningar, þrívíddarverk af hvalveiðiskipinu Pequod og persónum úr bókinni auk video-verks sem sýnt verður samhliða öðrum verkum.

Boðið verður upp á kaffi og kruðerí frameftir degi.