Árið 2025 var gott og viðburðaríkt hjá Hvalasafninu á Húsavík. Safnið tók á móti rúmlega 42.000 gestum og styrkti enn frekar stöðu sína sem mikilvægur viðkomustaður í menningar- og ferðaþjónustu á Norðurlandi, með sterka tengingu við hvalaskoðun og nærsamfélagið.
Fjölbreytt starfsemi einkenndi árið, þar sem áhersla var lögð á sýningar, fræðslu og miðlun. Meðal verkefna ársins voru sýningar og útgáfuverkefni á borð við The World Around Whales og Sjávarblámi, auk fræðsluverkefna og viðburða fyrir ólíka aldurshópa. Safnið tók einnig þátt í innlendu og alþjóðlegu samstarfi, meðal annars í tengslum við kvikmyndahátíðina Seas and Trees í samstarfi við Ocean Missions og viðburði á sviði umhverfis- og hafmála.
Rannsóknir voru áfram mikilvægur hluti af starfseminni. Starfsfólk safnsins tók þátt í söfnun sýna af strönduðum hvölum í samstarfi við Hafrannsóknastofnun og Rannsóknarsetur Háskóla Íslands og lagði þannig sitt af mörkum til aukinnar þekkingar á líffræði og ástandi stórhvela.
Rekstur safnsins gekk vel á árinu. Færri framkvæmdir en undanfarin ár skiluðu auknum rekstrarafgangi, samhliða nauðsynlegum endurbótum og fjárfestingu í aðstöðu sem styrkir faglega starfsemi safnsins til framtíðar. Undir lok árs hlutu verkefni safnsins jafnframt styrki til áframhaldandi uppbyggingar á árinu 2026.
Um þessar mundir verða einnig tímamót í starfsemi safnsins. Eva Björk Káradóttir lætur af störfum sem safnstjóri um mánaðamótin, eftir að hafa gegnt starfinu í átta ár. Á þeim tíma hefur hún leitt uppbyggingu og þróun safnsins af miklum metnaði og lagt ríka áherslu á fagmennsku, samstarf og framtíðarsýn.
Stjórn Hvalasafnsins þakkar Evu Björk Káradóttur kærlega fyrir vel unnin störf, farsæla forystu og ánægjulegt samstarf og óskar henni velfarnaðar í komandi verkefnum.
Jafnframt býður stjórnin nýjan safnstjóra, Arngrím Arnarson, hjartanlega velkominn til starfa og hlakkar til áframhaldandi þróunar og spennandi tíma hjá Hvalasafninu undir hans stjórn.
